Highschool Cambodia: Test Paper

Saturday, April 11, 2015

MEXT Scholarship 2002-2012 Collection

សម្រាប់ប្អូនៗដែលមានបំណងចង់ទៅសិក្សានៅប្រទេសជប៉ុន គួរតែស្វែងយល់ឲ្យបានច្បាស់លាស់ពីអាហារូបករណ៍ MEXT ជាមុនសិន ថាតើវាជាអាហារូបករណ៍ប្រភេទណា មានលក្ខខណ្ឌអ្វីខ្លះដើម្បីឲ្យយើងបំពេញ ហើយសំខាន់ថាតើវាផ្តល់ជំនាញត្រូវនឹងអ្វីដែលយើង ចង់ទៅសិក្សារឺអត់?
បន្ទាប់ពីស្វែងយល់ឲ្យបានច្បាស់ពីអាហារូបករណ៍ដែលប្អូន ចង់ដាក់ប្រឡងហើយ ជំហានបន្ទាប់ទៀត គឺការត្រៀមខ្លួនដើម្បីចូលរួមប្រឡង មានដូចជាការស្វែងរកឯកសារផ្សេងៗ ដែលអាហារូបករណ៍តម្រូវឲ្យយើងមាន និងឯកសារសម្រាប់រៀនត្រៀម ដើម្បីអាចដណ្តើមបានលទ្ធផលល្អក្នុងការប្រឡង។
ដោយមើលឃើញពីចំនុចទាំងអស់នេះហើយ បានជាសៀវភៅប្រជុំវិញ្ញាសាប្រឡងអាហារូបករណ៍ MEXT Scholarship 2002-2012 បានចងក្រងឡើងដោយក្រុមនិស្សិតនៃវិទ្យាស្ថានបច្ចេកវិទ្យាកម្ពុជាដែលបានប្រឡងជាប់អាហារូបករណ៍ MEXT Scholarship 2014។
សៀវភៅនេះ ត្រូវបានរៀបចំឡើងដោយផ្តោតលើការប្រឡងអាហារូបករណ៍ទៅសិក្សានៅតាមបណ្តាសកលវិទ្យាល័យនៃប្រទេសជប៉ុនតែប៉ុណ្ណោះ គឺមិនមែនសម្រាប់ការប្រឡងអាហារូបករណ៍ទៅបណ្តាប្រទេសផ្សេងៗនោះទេ។ សៀវភៅនេះមានរួមបញ្ចូលនូវប្រធានវិញ្ញាសា និងដំណោះស្រាយរាល់លំហាត់តាំងពីឆ្នាំ២០០២ ដល់ឆ្នាំ២០១២ លើមុខវិជ្ជាគណិត និងរូបវិទ្យា។ ហើយអ្វីដែលសំខាន់ដែលសៀវភៅនេះចង់ណែនាំដល់ប្អូនជំនាន់ក្រោយ គឺរបៀបដោះស្រាយក្នុងការប្រឡងនេះ ព្រោះវាមានលក្ខណៈប្លែកពីការប្រឡងអាហារូបករណ៍ទៅសិក្សានៅបណ្តាប្រទេសផ្សេងទៀត។
បន្ថែមទៅលើសៀវភៅនេះផងដែរ ប្អូនៗអាចចូលទៅកាន់វែបសាយអាហារូបករណ៍ជប៉ុន ដើម្បីទទួលបានវិញ្ញាសាបន្ថែមលើមុខវិជ្ជាភាសាអង់គ្លេស, គីមី និងភាសាជប៉ុនពីឆ្នាំ២០០៧ ដល់ឆ្នាំ២០១២ និងសូមចូលទៅកាន់ក្រុម Cambodian MEXT Generation (CMG) នៅលើទំព័រហ្វេសបុកដើម្បីទទួលបានចំនេះដឹង និងពត៌មានបន្ថែមពីបងប្អូនដែលបានប្រឡងជាប់អាហារូបករណ៍នេះ។
ជំនួសមុខឲ្យប្អូនៗជំនាន់ក្រោយទាំងអស់ដែលត្រូវការសៀវភៅនេះ ដើម្បីត្រៀមប្រឡងអាហារូបករណ៍ទៅសិក្សានៅប្រទេសជប៉ុន ខ្ញុំសូមថ្លែងអំណរគុណយ៉ាងជ្រាលជ្រៅដល់ក្រុមនិស្សិតដែលបានចំណាយកម្លាំងកាយ កម្លាំងចិត្តដើម្បីចងក្រងជាសៀវភៅនេះឡើង ដែលពិតជាឯកសារដ៏មានតម្លៃសម្រាប់កូនខ្មែរជំនាន់ក្រោយយកមកសិក្សា និងពង្រីកចំនេះដឹងរបស់ពួកគេបាន ហើយក៏សូមជូនពរឲ្យអ្នកទាំងអស់គ្នាដែលបានខិតខំចងក្រងសៀវភៅនេះមានសុខភាពល្អ និងមានជោគជ័យក្នុងការសិក្សា ស្រាវជ្រាវ ហើយក្លាយជាធនធានមនុស្សដែលមានអាចខ្វះបាន សម្រាប់ចូលរូមអភិវឌ្ឍន៍ប្រទេសជាតិយើងទាំងអស់គ្នា។
សូមជូនពរឲ្យប្អូនៗ ជំនាន់ក្រោយសម្រេចបានគោលដៅដែលបានគ្រោងទុក!